!! पृृथ्वी !!

!! पृृथ्वी !!

पृृथ्वीला नसतं विचारायचं तिचं वय
नसतं तोलायचं तिचं वजन
करायचंच असेल तिचं ओझं हलकं
तर आपल्याला व्हावं लागतं फुलपाखरू.

पृृथ्वी असते लहानग्या मुलाच्या हातातील चेंडू
इकडून तिकडे टोलावणारा
असते सूर्याच्या भाळावरील कुंकू
अवकाशातील अनुस्वार
ब्रम्हांडात हरवलेलं स्वतःचं अस्तित्व टिकवून ठेवणारं
दगडात उमललेलं एकाकी फुल.

पृृथ्वीचा इतिहास अनादी काळापूर्वीचा
काळाचाच जन्म झालेला असावा पृृथ्वीच्या उदरात
नव्या नव्या जन्मांना जन्म देऊनही
पृृथ्वी होत नाही कधी म्हातारी
सोसण्यासाठी ती उगवतच असते तिच्याच गर्भातून
पुन्हा पुन्हा
आपल्या चेहऱ्यावरील एका पुसट स्मितरेषेसाठी.

_ बाई तरी कुठे वेगळी असते पृृथ्वीहून ....

~
🍂 भगवान निळे