स्रीत्वाचे अस्तर

स्रीत्वाचे अस्तर
_____________________

आठवड्यापूर्वीच बायको
लख्ख उजेडात मुलीसमोर भांडली होती 
मलाही विशेष काही वाटले नव्हते
काही न वाटणे हेही नेहमीचेच.

काल रात्री देहजाणीव होताच
मी बायकोला खसकन जवळ ओढून घेतले
तर
प्रकाशात अवघडलेपण येते म्हणून
तिने ट्यूबलाईट बंद केली.
भांडण मुलीसमोर अन् प्रेम अंधारात
हे काही कळण्याजोगे नव्हते.
'उजेडात होते पुण्य, अंधारात पाप'
याचा पगडा असावा
किंवा आपले सुटलेले शरीर
नवऱ्याला दिसू नये असे बायकांना वाटत असावे.
अशावेळी
आगतिकतेपोटी तिच्यात आलेली सहनशीलता
भांडताना कुठे जाते हेच कळत नाही
अन् माझ्यातला आदिम पुरुष कुठे लुप्त होतो
हे तिलाही उमजत नसावे.
खरे तर
लैंगिक अस्तित्वाची मादी जवळ आली
तरी
नात्याने बायको असूनही
तिची 'स्री'म्हणून असलेली ओळख पुसली जात नाही
नि तिच्या डोक्यातला माझ्यातील पुरुषही घर सोडत नाही.

संभोगसमयी जांभळ्या काळोखातही
बायकोच्या स्रीत्वाचे अस्तर मात्र टिकून असते.....

~
भगवान निळे