हिरवेपण

हिरवेपण


जग दिवसेंदिवस अधिकच वाईट बनत चाललंय
हे तू मान्यच केले नाहीस कधी
सर्वकाही आलबेल आहे
आजूबाजूला हसतमुखी लोक आहेत
हे गृहीत धरून तू
शेवटचा दिवस समजून
आलेला दिवस नव्याने जगत राहिलीस
आयताकृती चिप्स झालेल्या आजच्या युगात
कॉपी पेस्ट करून फॉरवर्ड करीत राहिलीस स्वतः ला.
तू कधी पाहिले नाहीस लग्नाकडे
उपजिविकेचे साधन म्हणून
किरकोळ दुःख कुरवाळीत
केला नाहीस नुकसानीचा व्यवहार
विवाहाचा जुगार सगळ्यांनाच जिंकता येतो असे नाही
तुझ्या प्रेमाची जातच होती डोळस
त्यामुळे तुला करावे लागले नाही पावित्र्याचे नाटक
लैंगिक संबंधातील चोरटेपणा झुगारून
तू नात्यात आणू पाहिलास मोकळेपणा
योनीसुचितेशीच निगडीत असलेल्या
नीतिमत्तेच्या कल्पना नाकारल्यास
बाईपण कमरेला खोचून
खडकावर वाढलेल्या एकांगी कोंबासारखी
फुटून बाहेर आलीस
अन् मला शिकवून गेलीस एक सत्य..
_ झाडाचं झाडपण त्याच्या हिरवेपणात असतं !
~
🍂भगवान निळे